كراتان البطاطا و الكفتة والبيض المسلوق

مقادير كراتان

كيلو بطاطا
2 بصلات مشنفين
2 ضروس تومة
نصف كيلو كفتة
200 مل كريم فريش
2 فرماجات و اي فرماج اخر عندك
3 بيضات
كاس صغير حليب
شوية الزيت
زيت البلدية
موطارد
صلصة الصوجا
بشاميل (2 م الزبدة-2 م الدقيق-كاس كبير حليب-شوية الجوزة-ملح-ابزار-جبن)
معلقة تحميرة
معلقة سكينجبير
نصف معلقة ابزار
معلقة كامون
شوية الخرقوم
ملح
قرفة
شوية المعدنوس
الهريسة

طريقة تحضير كراتان البطاطا و الكفتة و البيض المسلوق  

اول حاجة كناخد البطاطا كنقطعها قطع صغيرة

و كنسلقها مع شوية الملح و الزيت

هنا ملي تسلقات صفيتها من هاد الماء

هنا وجدت كاس حليب مع اي فرماج عندي و الموطارد مع

كريم فريش والسر ديال البنة شوية ديال السمن

اقل من راس المعلقة و من طبيعة الحال ملح و ابزار

و الجوزة و درتهم فوق البوطة على نار مهيلة

وزدت عليهم البطاطا بعد ما صفيتها و بديت كنخلط الخليط

ديالي باش يولي بحال Purée حتى يعقاد بحال العجينة

هنا جبت مقيلة ديالي متكونش كتلصق و درت فيها البصلة

و الربيع و التوابل ديالي مع الصوجا و الثومة و الهريسة

و خليتهم يتقلاو مع الزيت

هنا البصلة طلقات الماء و بدات كتدبل

جيت و حطيت الكفتة ديالي مع كاس ديال الما

و خليتها تشحر حتى طابت

ملي طابت زدت عليها الزيت البلدية و خليتها تطيب حتى نشفات

طفيت البوطة على الكفتة و بديت كنحضر البشاميل

(م الزبدة-2 م الدقيق-كاس كبير حليب-شوية الجوزة-ملح-ابزار-جبن)

كندوب الزبدة و كنزيد الدقيق كنخلي كلشي يطيب

عاد نزيد الحليب و الجبن و الملح الابزار الجوزة

ملي يعقاد نطفي البوطة و نخليه يبرد

هنا سلقت البيض و قطعت الى نصفين

جبت المول ديالي و بديت بالبشاميل

قسمت البطاطا الى نصفين و حطيت طبقة ديال البطاطا

وطبقة ديال الحشوة ديال الكفتة

ومن الفوق البشاميل و البيض

اخيرا زدت طبقة ديال البطاطا و البشاميل من الفوق

دخلتها الفران حتى تحمر

جبت الفرماج محكوك

وهاهي وجدات الحمد لله

نتمنى تكون عجباتكم هاد الوصفة